Hallitus ja pääjohtaja (generaldirektör)
Kulttuurineuostoa johtaa johtokunta jonka maan hallitus valittee ja sillä oon kokohnaisvastuu toiminasta. Pääjohtaja Kennet Johansson oon viranomhaisen johtaja ja hällä oon vastuu jatkuvasta toiminasta. Nuin kaheksankymmentä ihmistä oon töissä kansliissa joka oon Filmitalossa (Filmhuset) Stockholmin Gärdet-aluheela.
Kulttuuripoliittiset tavotheet
Tämän päivän kulttuuripolitiikan perustheena oon kansaliset kulttuuripoliittiset tavotheet joista Ruottin valtiopäivät oon päättäny. Kulttuurin häätyy olla dynaaminen, haastava ja voima joka ei ole siottu mihink¬hään ja jolla oon sananvaphaus perustheena. Kaikila pittää olla maholisuus osalistua kulttuurielähmään. Kreativiteetti, moninaisuus ja taitheelinen laatu pittää leimata yhtheiskunnan kehitystä.
Rahhaa kulttuurille koko maassa
Tärkeä osa Kulttuurineuoston työstä oon ette jakkaa rahalista tukea. Kulttuurineuosto jako 1,7 miljardia kruunua vuona 2009. Kulttuurineuosto tukkee rahalisesti laitoksia, organisasjuunia ja vaphaita ryhmiä. Tukipäätökset tehhään työ- ja referensiryhmitten avula. Niitä oon yhtheensä 120 kirjailiaa, taiteiliaa, muu¬sikkoa, opettajaa, tutkiaa ja muita jokka arvioitteva hakemukset. Kulttuurineuosto vastaa yli neljästäkymme¬nestä eri tuesta ja se antaa tukea aina yksittäisistä kirjatittelistä ja nuoritten prujektista museoila tansi¬ryhmitten ulkomaan¬vieraihluin.
Tukea kansalisile minuriteetile
Kulttuurineuosto antaa toimintatukea ja prujektitukea sille ette kansalisitten minuriteetitten kieliä ja kulttuuria tuethaan. Net viis ryhmää jokka oon kansaliset minuriteetit Ruottissa oon saamelaiset, ruottinsuomalaiset, tornionlaaksolaiset, roomit ja juutalaiset. Minuriteettikielet oon jiddisch, romani chib, saamen kieli, suomi ja meänkieli, tornionlaaksonsuomi.
Yhistykset, organisasjuunit, laitokset eli muut joila oon organisajuuninumero saattava hakea tukea. Vuona 2009 jaethiin yhtheensä rapeat 7 miljoonaa kruunua kansalisitten minuriteetitten kielitten ja kulttuurin tueksi. Näistä yhtheensä rapeat 5 miljoonaa jaethiin näitten toiminalle: Tornionlaakson teatteri, Ruottin¬suomalainen kirjasto Stockholmissa, Juutalaisitten kirjasto Stockholmissa ja suomenkielinen Uusi teatteri/Nya finska teatern, joitten pittääki saa tukea Kuulttuurineuoston viranomhaispreivin (regleringsbrev) mukhaan.
Prujektitukea kansalisile minuriteetile
Tämän toimintatuen lisäksi, Kulttuurineuosto jakkaa prujektitukea eri prujektille jokka koskeva kansalisitten minuriteetitten kulttuurin ja kielen aseman parantamista. Tukea toiminale joka koskee kansalisia minuriteettiä saattaa tietenki kans hakea muista Kultturineuoston tukialuheista.
Kulttuurineuosto priuriteeraa insatsia jokka voimistava kansalisitten minuriteetitten kulttuuristryktyyriä/¬rakentheita ja lapsitten ja nuoritten toimintaa. Prujektilla pitäs olla muutaki osa-rahotusta, esimerkiksi kunnilta eli landstingiltä. Hakemus tehhään ruottiksi sähkösesti Kulttuurineuoston websivula. Tukipäätökset tekkee kulttuurineuoston pääjohtaja erityisen kansalisitten minuriteetitten kielitten, kulttuurin ja kirjalisuuen referensiryhmän ehotuksesta.
Lue enämpi tuesta kansalisile minuriteetile (ruottiksi)
Tukea kansalisitten minuriteetitten kirjalisuuele
Kulttuurineuosto antaa tukea kansalisitten minuriteetitten kirjalisuuen julkasemiselle ja sille ette kansalisitten minuriteetitten kirjalisuuen ja kulttuuriaviisitten julkasua ja jakelua eesautethaan. Kirjalisuustukea saattaa hakea kustantaja eli muu julkasia joka toimii Ruottissa ja jolla oon organisasjuuninumero, eli Ruottissa toimiva semmonen saamelainen organisasjuuni joka julkasee saamenkielisiä kirjoja julkasioitten kautta jokka toimiva Suomessa eli Norjassa. Tukea kansalisitten minuriteetitten kulttuuriaviisille hyväksythään tavalisesta tuotantotuesta kulttuuriaviisille.
Lue enämpi tuesta kansalisitten minuriteetitten kirjalisuuele (ruottiksi)
Samat oikeuet ja maholisuuet
Tasa-arvoperspektiivi oon tärkeä Kulttuurineuostolle ja koko kulttuurielämälle. Ko Kulttuurineuosto jakkaa tukea, niitten häätyy pittää huolen siittä ette niin vaimon- ko miehenpuolile annethaan samat oikeuet ja maholisuuet osalistua ja kasvattaa rikasta kulttuuritarjontaa.
Kulttuurielämä saatavilla
Kulttuurineuostolla oon vastuu siittä ette kulttuuri oon kaikitten saatavilla. Siihen vastuuhun kuuluu ette tukea, ko-ordineerata ja jou´uttaa kulttuurielämää ottamhaan vastuun vammaspolitiikan tavotheitten totheuttamisesta. Vieläki oon rohki paljon tekemistä sen etheen ette kulttuurielämä oon kaikile saatavilla.
Viiesosa kansasta
Lapset ja nuoret oon runshaat viiesosa kansasta ja meän lähtökohta oon, ette kaikila lapsila ja nuorila häätyy olla kulttuuri saatavilla ja ette heilä oon maholiisuus omhaan luomisheen. Taite ja kulttuuri tekevä ette lapset oon osana yhtheiskuntaa ja se auttaa ymmärtämhään muuta mailmaa. Kulttuurineuoston tavote oon ette lapsipers¬pektiivi oon osa toiminan kaikissa osissa. Lapsiperspektiivi häätyy olla matkassa dialoogissa niitten kans jokka hakeva tukea, ko tehhään statistiikkiä ja koothaan tietoja. Kulttuurineuosto oon matkassa verkostoissa, seminaarissa ja konferensissä jokka koskeva lapsi- ja nuorisokulttuuria ja tukkee tutkimusta lapsitten ja nuoritten kulttuurista.
Kulttuuria yli rajoitten
Kansanväliset kontaktit ja yhtheistyöt oon vaihtelevan kulttuuritarjonan ehto. Kulttuurineuosto tekkee niin strateegistä työtä ko antaa tukea kansanvälisen yhtheistyön lissäämiseksi, niin EU:n sisälä ko sen ulkopuolela. Yhtenä osana kansanvälisestä työstä Kulttuurineuosto pittää silmälä ja antaa tietoja EU:n politiikasta ja toiminasta kulttuurialuheela. Kulttuurineuosto anto yhtheensä kohta viiskymmentä miljoonaa kruunua suohraan kansanväliselle ja monikansalis-/interkulttuuriselle toiminalle vuona 2008, joista 8 miljoonaa kruunua kansanväliselle kirjalisuusyhtheistyöle.
Yhtheys
Statens kulturråd
Box 27215
102 53 Stockholm
Telefooni: 08-519 264 00
Faksi: 08-519 264 99
E-posti: kulturradet@kulturradet.se
Käynit: Filmhuset, Borgvägen 1
Aukioloajat: maanantai-perjantai klo. 08.30-16.30