Till navigation Till innehåll

Buorisboahtem Kulturrådetij (kultuvrrarádáj) – dánna mij giehttop ienebuv bargoma birra

Gájka galggi bessat dájddagijt ja kultuvrav niektit alla kvalitehtas. Dat la mijá stáhta fábmudakvidno vuodo. Viddno boahtá rijkalasj kulturpolitijkalasj mihttomierijs majt Rijkabiejve li mierredam.

Mihttomiere javlli: ”Kultuvrra lehkis viesso, hásstaliddje ja gártjedimek fábmo hållamlåbijn vuodon. Gájka galggi bessat oasev válldet kultuvrraviessomis. Sjuggelisvuohta, valjesvuohta ja dájdulasj kvalitehta bájnnis sebrudagá åvddånimev.”

Biednikdårjajimme ja ietjá bargoj baktu mij viehkedip vaj kulturpolitijkalasj mihttomiere ålliduvvi.

Juohke jage juohkep badjelasj guokta millijárda kråvnåjs iehtjádij siegen

  • låhkåmussaj, låhkåmåvdedussaj ja girjjevuorkájda
  • gåvvå- ja hábmedájddagijda ja dávvervuorkájda
  • musijkkaj, teáhterij, gärssusij ja dálásj ájge sirkusij
  • dahkke skåvllåj ja kultuvrraskåvllåj
  • rijkalasj unneplågoj kultuvrraj.

Badjelasj akta millijárdda kråvnåjs manná Svieriga dajvajda kultuvrraaktijbarggomodella baktu.

Mijá biednikdårja gávnnuji bargojt doarjodittjat ma äládussan barggi dájddagij ja kultuvrajn Svierigin ja rijkajgasskasattjat. Dårja åledi åvddåmerka diehti kultuvrrasiebrijt, organisasjåvnåjt, juohkusijt, almodagájt ja kommuvnajt.

Miedegis fábmo mij galggá gájkajda årrot

Kultuvrra loaggá, ietjájduhttá ja åvdet aktugasj ulmutjijt ja ålles sebrudagájt. Dat la miedegis fábmo, mij galggá gájkajda årrot. Mij sihtap ienebujt bessat kultuvrav niektit jårbbå rijkan ja sihtap ådå juohkusijda jåvsådit ma uddni e niekti kultuvrav. Sihtap aj åvdeldimijt buktet vaj gájkka ulmutjijn la jäbddásasj riektá ja máhttelisvuohta kultuvrraviessomav bájnatjit ja dasi årrot oasálattja.

Kulturrådetin la Ráddidusás sierralágásj gåhttjom ájn vuojátjit jäbddásasj riektáj ja máhttelisvuodaj åvddånimev hbtq-ulmutjijda, dat la ulmutjijda gejn la sierra sjiervveidentitehta jali gudi råhtåsi seksuálalattjat ietjasa sjärvváj. Galggap iehtjádij siegen nuppástiddje normajt bigodit. Hbtq-ássje l akta mijá åvdedum guovlojs gå biednikdårja birra mierredip, valla ij juohkka åtsålvisán mij mijás oadtju doarjodagáv dárbaha hbtq-ássje daŋgas diehti årrot guovdátjin.

Kulturrådet la aj suorggevásstálasj fábmudahka sajijvuohtaj, sierralágásj gåhttjomijn åvddånimev vuojátjit ájn vaj kultuvrraviessom sadjihabbon sjaddá ulmutjijda gejn la doajmmahieredibme.

Mánáj ja nuoraj riektá kultuvrraj

Mánáj ja nuoraj riekta kultuvrraj la åvdedum ássje rijkalasj kultuvrrapolitijkan. Mijá viddno l vaddet ienep mánájda ja nuorajda máhttelisvuodav niektit dájddagijt ja kultuvrav ja oasálattja årrot dahkamij. Dasi duodden galggap sidjij vaddet máhttelisvuodav bájnnet – årrombájke dagi, sosioekonomalasj aktijvuodaj dagi, doajmmahieredimij dagi ja etnisitehta dagi.

Kultuvrraskåvllåguovdátjijn barggap åvddåmerka diehti kultuvrraskåvlåv dagátjit rievtugabbon ja sadjihabbon, ahte ienep máná ja nuora bukti kultuvrraåhpadusáv oadtjot alla kvalitehtas.

Adnep aj måttijt låhkåmåvdediddje bargojt ma muhtem mieres jali ållåsit åledi mánájt ja nuorajt. Soames buojkulvisá li Bokstart (Girjjeálggo), Barnbokskatalogen (Mánájgirjjekataloga) ja Läsambassadören (Låhkåmambassaderra).

Dajs biednikdårjajs majt juogadip de bájken 60 prosännta manná bargojda mánáj ja nuoraj åvdås.

Tjuottjodip aj girjálasjvuodabálkáv Astrid Lindgrena mujtton, värálda stuorámus mánáj- ja nuorajgirjálasjvuohtabálkáv, mij juogeduvvá akti jagen.

Dájddaga ja kultuvrra rijkkarájij badjel

Rijkajgasskasasj lånudibme nannot dájdaåvddånimev ja doalvvu valjesvuohtaj ja ájvanij kultuvrrafállagin – Svierigin ja aj ålggorijkan. Dat la mijá rijkajgasskasasj bargo vuodo.

Iehtjádij siegen adnep biednikdårjajt, ma rijkajgasskasasj lånudimev doarjju dájddárijda moatten guovlon, ja doarjodagájt vaj Svieriga kultuvrraorganisasjåvnå bessi rijkajgasskasasj värmmádagájn säbrrat. Hållamloahpe ja álmmukstivrra li aj ássje maj nali tjalmostip, iehtjádij siegen doarjodagáj baktu nihtedum dájddárijda gudi oakkev åhtsi Svierigis.

Kulturrådet adná gåhttjomav jårggålum dárogiellåhkåmusáv åvdedittjat. Dåjman Swedish Literature Exchange li åvddåmerka diehti ållo umasse biednikdårja majda åhtsåt.

Barggap aj vaj Svieriga kultuvrraorganisasjåvnå lulun buktet rijkajgasskasasj värmmádagájn säbrrat ja juogadip juohkka jage biednikdårjajt rijkajgasskasasj värmmádagájda.

Mij lip rijkasasj aktavuohtaguovdda EU:a kultuvrraprográmmaj Kreativa Europa (Sjuggelis Europa) ja Unesco 2005-konvensjåvnnåj mij galggá kultuvralasj valjesvuodav ja rijkajgasskasasj kultuvrralånudimev suodjalit.

Mijá webbabájken buvtá enabuv låhkåt mijá bargojs ja gåktu dagá vaj mijá biednikdårjajda åtså.