Šukar aljen ko Kulturrådet (Kulturako zavod) - akate vačeripe pobuter ando amende

Sarine valjani te oveljen šajipe te ljen kotor ki umetnost hem kultura koja isila baro kvaliteti. Odova tano amaro bučako temelji sar državaki ustanova. I buti čerelape adžahar so ičerenape o nacionalna kulturnopolitička ciljja kola i državaki skupština odlučija.

O cilji phenela: ”I kultura ka ovel dinamično, zanimljivo hem bizavisno zoraljipe kolako temelji tano ko slobodno vačeribe. Sarine ka oveljen šajipe te ljen kotor ko kulturako dživdipe. I kreativnost, o averčhanibe hem o umetničko kvaliteti ka utičini ko odova sar o društvo razvijinipe.”

Sa amare fondija hem aver aktivitetija kola isimen tane fokusirime te ičeren ki praksa odola kulturnopolitička ciljja.

Svako berš amen ulava dži ko duj milijarde krune te čerelpe buti:

  • Literatura, te bajraripe o čitibe hem o biblioteke
  • Slikovno hem aver umetnost hem o muzeija
  • Muzika, pozorište, čheljibe hem avdisutne cirkusija
  • Čeribasi škola hem kulturaki škola
  • Nacionalno manjinengi kultura

Uzo jekh milijarda krune džala ko regionija ki Švedska ko modeli kulturaki saradnja.

Odola pare džana te podržinenpe o aktivitetija kase i umetnost hem i kultura tani jekh profesionalno buti sar ki Švedska adžahar hem ko aver phuvja. On tane usmerime ko kulturake udruženja, organizacije, grupe, izdavačija hem komune.

Pozitivno sila koja valjani te ovel othe sarinendže

I kultura uticini, promini hem bajrari svako jekhe manuše ama hem celo društvo. Odija tani jekh pozitivno sila koja valjani te ovel othe sarinendže. Amen manga pobuter manuša te oveljen pristup kulturače ki celo phuv hem te resa dži ko neve grupe kola avdije naneljen odova pristup. Amen manga hem te čera šajipe sa e manušendže te oveljen jekh pravo hem šajipe te uticinen ko kulturako dživdipe.

O Kulturrådet isilje jekh specialno buti kotar phuvjaki vlada, te bajrari o razvoj o hbtq-manuša (o homoseksualna, o biseksualna, o tranvestitija hem sa aver seksualna manjine) te oveljen jekh pravo hem šajipe sar sa avera. Maškaro aver buča amen valjani te mothova o diskriminime norme. O hbtq tane jekh ando amaro prioriteti keda ana odluke ko ka dobini pare, ama odova na značini so svako projekti kova rodelape valjani te ovelje fokus ko hbtq manuša.

O Kulturrådet tano odgovorno sektor kova valjani te čerel buti i kultura te ovel pristupačno. Jekh posebno buti tani te vazdel i pristupačnost e manušendže kola isiljen disavo invaliditeti.

E čhavorengo hem e ternengo pravo ki kultura

E čhavorengo hem e ternengo pravo ki kultura tano jekh prioritetno pučibe ki nacionalno kulturaki politika. Amari misija tani te da so pobuter čhavorendže hem ternendže šajipe pobuter te khuven ki umetnost hem ki kultura, te šaj kokri te čeren hem te utičinen bizo te ljelpe ko obzir kuri živinena, društveno ekonomsko status, invaliditeti ja oljengo etniciteti.

E centreja e kulturake školače, sar primer, čera ko odova i kulturaki škola te ovel pojednako hem popristupačno, te šaj so pobuter čhavore hem terne te dobinen kvalitetno kulturaki edukacija.

Isimen hem nekobor inicijative kola bajrarena o čitibe, kola tane ekvaš ja sa čerde e čhavorendže hem e ternendže. Disave primerija tane o Bokstart, Barnbokskatalogen hem Läsambassadören.

Ando sa o fondija kola deljijam 60% džana ko projektija e čhavorendže hem e ternendže.

Amen isimen hem jekh književno nagrada kuri setinamen ki Astrid Lindgren, hem akija tani najbari nagrada ko sveto usmerimi ki književnost e čhavorendže hem e ternendže, a deljinipe jekhvar ko berš.

I umetnost hem i kultura hem ko avera phuvja

O internacionalno razmenibe zorjačeri o umetnično razvijibe hem čerela averčhanipe hem kvaliteti ki kulturaki ponuda sar akate ki Švedska a adžhar hem ko aver phuvja. Akija tani i jekhto than ki amari internacionalno buti.

Maškaro avera, amen isimen hem fondija kola podržinena o internacionalno razmenibe ko but umetnička deljija, a hem pomožina e kulturake organizacije ki Švedska te šaj te oven ki jekh internacionalno mreža. Vačeribnjasi sloboda hem i demokratija tane isto pučiba ko kola fokusirinamen, adžahar so, na primer, daja podrška e ugrozime umetnikonendže kola rodena zaštita ki Švedska.

O Kulturrådet isilje buti hem te bajrari i švedsko literatura ko prevodibe. Ani inicijativa Swedish Literature Exchange isi nekobor fondija kola šaj te rodenpe.

Amen pomožina hem o kulturake organizacije ki Švedska te oven ki jekh internacionalno mreža hem svako berš daja pare e internacionalno mrežače.

Amen hijam nacionalno kontaktno than e kulturake programese kotar EU kova vičinipe Kreativno Evropa hem UNESCO 2005 - jekh konvencija koja isila buti te arakhi e kulturako averčhanibe hem o internacionalno kulturako razmenibe.

Ki amari rig ko internet šaj pobuter te čitine ando amende hem isitu pobuter informacije ando odova sar šaj te rode pare ando amare fondija.