Till navigation Till innehåll

Sukaravade to Kultúragodit - Akate parmissar vorsnos bùttar basi vosnos bukjakeripe

Sass nasht nasta le kota attjer dsanibe ta kultura attjer hemu kvaliteti. Kava honkar telipen gla vorot  opprecitni savo themjarlo bastalo. Opprecitnet vrijar fann dolle nacionalipha kultúrapolitikats  resinen savo themmdivusen kammar agorbat.

Resinen puckar te: ”Kultúra nasht asha jeck dinamicano,  vriaschade ta otavat soraliphe ninna  vakeriphemuck savo teliphe. Sass nasht kamma saipet te kotak an kultúrajibben. Bukjarnot, bútipe ta  dsanibelig kvaliteti nasht nisani sarinipets angledsajpe ”.

Preal vóroa hasting ta vavran bukjakeripe lelakotar vorsnos to te dolle kultúrapolitikats  resinen pherells.

 Svacko basjt ulavelar vorsnos vri komaj dy milijarda lokkar to maskar vavoret:

  • Hramipar, dràbbkerelade ta librikhern
  • Tella- ta formadsanibe hem museir
  • Bàschi, teatri, kella ta nitjiro ballo
  • Kerelade, dràbbrahisp ta kultura dràbbrahisp
  • Nacionalipha haripars kultúra

Komaj jeck milijarda lokkar jar to regionirna an Svedijo preal kultúraprograma.

Vóroa hasting honkar to gla te dumoja bukjakeriper savo fakkar sanatidsanto ninna dsanibe ta kultúre an svedijo ta internacialikant. Dolle rigarer siros misalipa to kultúrakhedipe, organiphar, kupar, glakonu ta komúnar.

Jeck pozitip soralipe savo nasht ásjades gla sass

Kultúra prekerepar, avekerela ta angledsajber ulavdoa manuschar ta saroa sarinipen. Kava honkar jeck pozitip soraliphe savo nasht ásjades gla sass. Vorsnos mangela te bùttar nasht le tovolta to kultúra an saroa themmet ta èpa nevoa kupar savo andivus tji ler kota attjer kultúra. Vorsnos mangela aur kerel pakjalapa gla te sass manuschar nasht kamma sicklo horte te saiper te kamma  pheribe schettani ta asha hemimo a kultúrajibben.

Kultúragodit kammar jikk ulavela opprecitni fann phuvjakirin te ingar pre angledsajben gla sicklo caciper ta saiper gla hstqi-dsenor, kava mangela homoseksualia, sexualipha, transidsenor ta dsenor ninna queera nisani ta identiti. 

Kultúragodit honkar aur kotoriphe dochalo bastalo gla resutnophat, ninna jikk ulavela opprecitni  te ingar pre angledsajben sav te kultúrajibbet ovil bùttar resutnot gla dsenor ninna vinephachinaviphe.

Núckos ta ternoas horte to kultúra

Núckos ta ternos horte to kultúra honkar jeck  dela anglonised púscha an dova nacionalipha kultúrapolitikan. Vorot opprecitni honkar te le bùtt núckor ta ternoa jeck  saipet te le kotar attjer dsanibe ta kultúra, asha hemimo an kerelande ta le dolle jeck  saipet te prekerepa, ososkip attjer kheredthan, socijoeknomipha viavahari, vinephachinaviphe ire avgiphe.

Ninna kultúradrabrahisp centri fakkar vorsnos misalipa gla te kerra  kultúradrabrahispan bùttar jekhip ta resutnot, sav te bùttar núckor te ternoa nast le kultúrasikavibe attjer kupa kvaliteti.

Vorsnos kammar thaj bùttar drabbkerelade chijber savo rigarer siros kotasikk ire sarot to núckor ta ternoa. Hari misal honkar Libriavgojbe , Nuckokatalogin ta dràbbambasadorin.

Attjer dolle hastrin vorsnos kotanar vri jar sakhedemo jurat komaj 60  procenti to bukjakeripe gla núckor ta ternoa.

Vorsnos administripha aur hramiparmóllepat to Astrid Lindgrens hatus, sumnalens bàroaste núcko- ta ternopàs hramiparmóllepat, savo kotanas vri jeck volta ko basjt.

Dsanibe ta kultúra preal themmdànnikerna

 Internacialikant  paruviphe sordalonipe dova dsanibelige angledsajben ta kerelar bútipe ta kvaliteti  an kultúraparuviphet – solduj an Svedijo ta avrithems. Kava honkar vrivoltasnuktan gla vorot internacialikano fakkepa.

Maskar vavoret kammar vorsnos hastring dumojar internacialikant paruviphe andre bùttar dsanibethan, ta dumo gla te kultúraorganiphar an Svedijo nasht nasta asha ninna an internacialikano reselen. Vakeriphemuck ta demokratiriphe honkar aur puchar vorsnos rigarir pre, maskar vavoret preal dumo to muckfóror gla tracha dsaniber savo roder arakdel an Svedijo.

Kultúragodit kammar opprecitnet te kerela svedo hramipar an chibrandring. Andre shiveliphen Swedish Hramipar Paruvipheasjas asjas kava misalipa jeck nice najek hastring te rode.

Vorsnos fakkar aur gla te kultúreorganiphar an  Svedijo nasht nasta asha ninna an internacialikanor reselen ta ulavela ta ulavela svacko basjt hastring to internacialikanor reselen.

Vorsnos honkar nacionalph kontaktinukta gla Evropikapos kultúraprograma Bukjarno Eropi ta   Unescos 2005-konvencija savo nasht arakdela dova kultúraliphe bútipen ta internacialikant kultúraparuviphe.

Pre vósnos webbthan nast diro dràbbra bùttar basi vósnos bukjakeripe ta sar diro kerra gla te rode vóroa hastring.